Авлигатай тэмцэх газраас авлига, ашиг сонирхлын зөрчлөөс урьдчилан сэргийлэх чиглэлээр төрийн албан хаагчдад зориулсан сургалтыг танхимаар болон цахим хэлбэрээр тогтмол зохион байгуулдаг билээ.
Энэ хүрээнд Хөгжлийн бэрхшээлтэй хүний хөгжлийн газар, Гэр бүл, хүүхэд, залуучуудын газар, Сүхбаатар, Сонгинохайрхан дүүргийн Нийгмийн даатгалын хэлтэс, Эрүүл мэндийн хөгжлийн төв, Баянзүрх дүүргийн Газар зохион байгуулалтын алба, Баянхонгор аймгийн Засаг даргын Тамгын газар, Улсын бүртгэлийн хэлтэс, сумдын төрийн байгууллагуудын удирдах болон гүйцэтгэх түвшний 506 албан хаагчид авлига, ашиг сонирхлын зөрчлөөс урьдчилан сэргийлэх мэдлэг олгох, авлигын хор аюулыг ухуулан таниулах цахим сургалтыг зохион байгууллаа.
Сургалтад “Авлигын хор хөнөөл, авлигаас урьдчилан сэргийлэх арга зам”, “Ашиг сонирхлын зөрчлөөс урьдчилан сэргийлэх тайлбар, мэдэгдэл гаргах тухай”, “Монгол Улсын Эрүүгийн хуульд авлигын гэмт хэргийг хуульчилсан байдал” зэрэг сэдвүүдээр танилцуулга, мэдээлэл хийгдэж, албан хаагчид сонирхсон сэдвээ бататгасан асуулт, хариулт бүхий өгөөжтэй сургалт болж өндөрлөлөө.
