Авлигатай тэмцэх газрыг “Тохижилт сайтай цэмцгэр байгууллага”-аар нэрлэж, “Баярлалаа” хэмээх тусгай тэмдэг байрлуулах эрхтэйг нийслэлийн Сүхбаатар дүүргийн 5 дугаар хорооны Засаг даргын ажлын албанаас мэдэгдэв. 

Нийслэлийн Засаг даргын захирамжаар батлагдсан нийслэлийн 2015 оны шилдэг тохижилт, ногоон байгууламжтай, цэмцгэр байгууллага, аж ахуйн нэгж шалгаруулах болзолт уралдаанд Авлигатай тэмцэх газар дүүргийн нутаг дэвсгэртээ манлайлан оролцож байгааг ийнхүү сайшаалаа. Уг уралдаанд нийслэлийн 9 дүүргийн нутаг дэвсгэрт үйл ажиллагаа явуулж буй бүх байгууллага, аж ахуйн нэгж, иргэн өмчийн төрөл хэлбэр харгалзахгүйгээр хамрагдаж байгаа юм байна. 

Уралдаан нь нийслэлийн нутаг дэвсгэрт үйл ажиллагаа явуулж буй бүх байгууллага, аж ахуйн нэгжийн үйл ажиллагааг идэвхжүүлэх, нийгмийн хариуцлагыг өндөрсгөх, тохижилт бүтээн байгуулалт, хог хаягдал, цэвэрлэгээний менежментийг сайжруулах, ажлын шинэ санал санаачилгыг дэмжих, хотын өнгө үзэмжийг дээшлүүлэх замаар иргэдийн ая тухтай орчинд ажиллаж амьдрах нөхцөлийг бүрдүүлж байгаагаараа ач холбогдолтой юм. 

Улаанбаатар хотын тохижилтод идэвх чармайлттай оролцож, онцгой ахиц дэвшил гаргасан байгууллагад сайшаасан “Тусгай тэмдэг”-ийг Авлигатай тэмцэх газар байрлууллаа.